काठमाडौँ । काठमाडौ महानगरपालिकाका मेयर बालेन्द्र शाह (बालेन) ले केन्द्र सरकारलाई काठमाडौंको हितमा काम नगर्ने भए सिंहदरबार अरू ठाउँ नै सार्न चुनौती दिनुभएको छ ।
आज सामाजिक सञ्जालमार्फत उहाँले सरकारले काठमाडौंको हितमा काम गर्न नसकेको गुनासो गर्दै उहाँले सिंहदरबार अरू पालिकामा सार्न आग्रह गर्नुभएको हो ।
साथै, बालेनले राजधानी सारे पनि काठमाडौंबासीलाई कुनै आपत्ति नहुने बताउनु भएको छ । उहाँले काठमाडौंबासीलाई सम्पदा, संकृति, कला, सभ्यता चाहिएको तर राजनीति नचाहिने समेत बताउनु भयो ।
महानगरपालिकाले सुकुम्बासीलाई हटाउन खोज्दा सरकारले असहयोग गरेको भन्दै मेयर शाहले यसअघि सिंहदबार र राष्ट्रपति कार्यालयको फोहोर नउठाउने घोषणा गर्नु भएको थियो ।
यस्तै, सत्ता साझेदार दल नेपाली कांग्रेसका नेता डा. शेखर कोइरालाले सिंहदरबार परिसरको फोहोर उठाउन संघ र स्थानीय सरकार जिम्मेवार बन्नुपर्ने बताउनु भएको छ ।
आज सामाजिक सञ्जाल फेसबुकमा स्ट्याटस लेख्दै उहाँले काठमाडौं महानगरपालिकाले सिंहदरबारलगायत स्थानको फोहोर नउठाउनु अराजकता भएको बताउनु भएको हो ।
सरकारले पनि महानगरले उठाएका प्रश्नको बेवास्ता गर्दै धम्कीको भाषा प्रयोग गर्नु सिंहदरबारले स्थानीय निकायलाई हेर्ने दृष्टिकोणको प्रतिविम्ब भएको उहाँले उल्लेख गर्नु भयो ।
